නැන්දම්මාගේ ඩයරිය

2022 ජුනි 20

දැන් මට ටික ටික වාහනේ එළවගන්න පුළුවන්. ඔන්න අද ලේලි මට පාරේ යන්න පුරුදු කරන දවස. අපෝ! ඒකි එක්ක බෑ… “බේක් ගහන්න, ගහන්න. ඇස්සොලේටරේ පාගන්න, පාගන්න. කපන්න, කොටන්න, තෙල් දාන්න, තෙම්පරාදු කරන්න.” ගගා බෙරිහන් දෙනවා. “ලයිට් දාන්න, හෝං ගහන්න, කෙළින් යන්න.” ගාලා ආයේ කන ළඟ කෑ ගහනවා.

අන්තිමට ලේලිගෙ දෝස් මුරේ මැද්දේ හන්දියෙන් වාහනේ වමට හරවලා ටිකක් දුර ගිහින් හරවගෙන ආවා. ආයේ ගියා. මෙන්න යකඩෝ ශීලගෙ බඩකඩිත්තුව අපේ පිටිපස්සෙන් හෝං ගහනවා. යකෝ… ඒක පුදුම හෝං එකක්. හිටපන්කෝ… ඕකිට කොහෙ යන්න තදියමද? මම ගියේ හෙමීටමයි. මම හෙමීට ගිහින් කෙළින්ම හැරෙව්වා හන්දියෙන් ඇතුළට. ගැහුවා බ්‍රේක්. අප්පටසිරි! ඇන්නෙ නැතෑ ශීලා ඇවිත් පැත්තෙන්. මේකිගෙ පැලියාව කොච්චරද? දෙයි සන්තෝ… පුතාගෙ වාහනේ පැත්ත ඉවරයි. ලැයිසොනුත් නෑ නේ. අන්තිමට ලේලි එළෙව්වේ කියලා ඉන්සූරන්ස් එකට කතා කරලා යන්තම් ඒ හුටස්පරේ ඉවර කළා. ශීලගෙ ඉන්සූරන්ස් එකට කලින් අපේ එක ආවා. හොඳ වැඩේ ඕකිට.

******************